【效力無綫36年】有「體壇譚玉瑛」之稱 體育節目殿堂級主持韓毓霞約滿離巢

近年無綫藝人離巢已經唔係新鮮事,除咗小生花旦之外,唔少資深藝人都選擇離開,繼劉江、李麗麗及古明華等人之後,最新嘅係體育節目殿堂級主持韓毓霞(Wendy)。

現年59歲嘅韓毓霞,1979年參選港姐後入行,1984年加盟無綫主持《體育世界》,同埋多個大型體育節目,單單係奧運會,佢就已經採訪過7次,所以佢被稱為「體壇譚玉瑛」。除咗主持體育節目之外,韓毓霞都有參演唔少劇集,例如《新鮮人》、《女人最痛》、《一屋老友記》、《親親我好媽》、《BB來了》及《愛·回家之開心速遞》等等,不過都係客串居多。報道指,自從無綫解散體育組及停播《體育世界》後,韓毓霞被投閒置散,工作量大減,韓毓霞仲話公司喺過去大半年都冇安排工作俾佢,所以今個月約滿後離巢,離開效力36年嘅無綫,不過韓毓霞就強調佢哋係「和平」分手。

喺接受傳媒訪問時,韓毓霞被問及去向,佢就話打算退休,退出娛樂圈,另尋興趣同方向發展。

发表评论

电子邮件地址不会被公开。 必填项已用*标注